31 juillet 2007

La vache qui rit...

اليوم جاني تاليفون علي الصباح الفتاح، غزرت لي النومرو ما عرفتوش
بعد تردد، قررت باش نقبل الموكالمة
أنا: ألو
جاني صوت مرا
هي: آآآلووو، آآآللووو
ما عقلتش الصوت، و قلت لازم هاذي غالطة في النومرو
أنا: إتفظل مادام، إشكون معايا؟
هي بدات تقهقه وقالتلي: آنا مادام قوتا ، صاحبة بوك!!!! وإترشقت بالضحك....
أنا إسكت، وقعدت ما نيش مصدق إلي نسمع فيه....يا ربي شنيا حكاية ها القوتا ولا ها الجبنة هاذي
إلي تطلب فيا علي الصباح بش تقلي إلي هي صا حبة الوالد؟؟؟
عادا كيف شافتني إستلبست، قالتلي: إنشاء الله تطلع بحبوح كيف بوك!!!!
تي شبيها هاذي؟
بعد ما سألتها شكون هي بالظبط واش تحب، طلعت المادام هي مرت صاحب الوالد، ما تفدلكش كيف قا تلي إلي هي إسمها "مادام قوتا"، و طالبتني بش تسقسي علي ستاج لي بنتها، تقول آنا هو مدير البانكا!!
حاصيلو و قتها فهمت إلي أنا طحت علي وحدة ظامرة باااااارشا....من فوق اللازم زادا!!!
أي أكهو عاد، ترصاطلي فرحت بصاحبة الوالد، و جا وبت علي المليون سؤال الي طرحتهملي: آش قريت؟ وين قريت؟ آش تزمر؟ ألخ
اليوم بش إنروح لالدار و بش إنقول للوالد يبدل الخلطة متاعو!!!! :)))

4 commentaires:

SAFOne a dit…

tsa9si 3la stage ??? ya weldi louga havika...tsa9si 3la rajel él bintha!
za3ma bintha thamra kifha ? :D

3amrouch a dit…

wallah e9teltni bethe7ek
mella fezaa.
ya wallah a7well

walis a dit…

lé matoskotlouch hedhi el 5lot li t9ala9 el wa7id w t9aymou minoum matsa3idich.:))

Sami III a dit…

loooool
tawil bélék, ama 9ollha ma thammach stage :D khater kén t7él hél bab ma 3adéch tnajjam tsakkrou émba3ad 5aterha ta3raf bouk :p